ᓄᓇᕗᒻᒥᐅᓕᒫᑦ ᐊᑐᐃᓐᓇᖃᕆᐊᖃᖅᐳᑦ ᓈᒻᒪᒃᑐᓂᒃ ᐊᑦᑕᓇᓐᖏᑦᑐᓂᒃ, ᓂᕿᒋᒐᔪᑦᑕᓂ ᐱᐅᓂᖅᓴᒻᒪᕆᐅᓪᓗᑎᒃ, ᐊᑭᑐᓗᐊᓐᖏᑦᑐᓂᒃ ᓂᕿᑦᑎᐊᕙᐅᔪᓂᒃ ᓂᕿᓂᒃ, ᓂᕿᓕᕆᔾᔪᑕᐅᔪᑎᒍᑦ ᓴᖅᑭᔮᖅᑎᑦᑎᔪᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᓱᓕᔪᖅᓴᖅᑐᑦ, ᐃᒻᒥᓂᒃ ᒪᑭᒪᔪᓐᓇᕐᓂᕐᒧᑦ, ᐊᒻᒪ ᐊᕙᑎᑦᑎᓐᓂᒃ ᐱᔭᐅᔪᑦ ᐱᑕᖃᐃᓐᓇᕈᓐᓇᖅᑐᑦ.
ᑲᒪᓇᓱᐊᕐᓂᖅ ᓂᕿᒃᓴᖃᑦᑎᐊᖏᓐᓂᐅᔪᒻᒪᕆᐅᕙᑦᑐᒥᒃ ᓄᓇᕗᒻᒥ ᑲᑐᔾᔨᓗᑕ ᑲᒪᒋᔭᕆᐊᖃᕋᔭᑦᑎᒍᑦ; ᑕᒪᒃᑮᓐᓄᑦ ᐊᑐᓂᑦ ᐊᒻᒪ ᑲᑐᔾᔨᖃᑎᒌᓪᓗᑎᒃ ᐱᔭᒃᓴᖃᖅᑐᐃᓐᓇᒐᑦ. ᓄᓇᕗᒻᒥ ᓂᕿᒃᓴᖃᕆᐊᖃᕐᓂᕐᒧᑦ ᑲᑐᔾᔨᖃᑎᒌᖑᔪᑦ ᑐᑭᓯᐅᒪᔪᑦ ᐊᑕᐅᓯᑐᐃᓐᓇᖅ ᐱᔪᓐᓇᖏᒻᒪᑕ ᐊᒻᒪ ᐱᔪᓐᓇᑦᑎᐊᕆᐊᖃᕐᒪᑕ ᑲᒪᒋᑦᑎᐊᕋᓱᐊᕐᓗᒍ ᐱᔭᕐᓂᖏᑦᑐᖅ ᓂᕿᒃᓴᖃᑦᑎᐊᖏᓐᓂᐅᕙᑦᑐᖅ. ᐱᓕᕆᖃᑎᒌᒋᐊᖃᖅᑐᒍ ᐊᕗᓐᖓᒃᑲᓐᓂᕋᓱᓪᓗᑕ ᑕᒪᒃᑯᓄᖓ ᐱᒋᔭᑦᑎᓐᓄᑦ.
ᑐᑭᒧᐊᒍᑕᐅᔪᑦ:
- ᓄᓇᕗᒻᒥᐅᖑᓪᓗᑕ, ᑕᐃᒫᒃᓴᐃᓐᓇᖅ ᑭᒃᑯᓕᒫᑎᑐᑦ, ᐱᔪᓐᓇᐅᑎᖃᖅᑐᖅ ᓈᖕᒪᒃᑐᓂᒃ ᓂᕿᖃᕆᐊᖃᕐᓂᖏᓐᓂᒃ, ᐱᖃᓯᐅᑎᓪᓗᒋᑦ ᐃᒻᒥᓂᒃ ᓂᕆᔭᒃᓴᓂᒍᓐᓇᕐᓗᑎᒃ ᐊᒻᒪ ᐃᓚᒋᔭᐅᖃᑕᐅᔪᓐᓇᕐᓗᑎᒃ ᐃᓱᒪᓕᐅᕈᑕᐅᔪᓂᒃ ᑕᒪᒃᓱᒥᖓ ᓂᕿᓕᕆᓂᕐᒧᑦ ᐋᖅᑭᒃᓯᒪᔪᒥᒃ.
- ᓄᓇᕗᒻᒥ ᓂᕿᖃᕐᒪᑦ ᒪᑯᐊᖑᓪᓗᑎᒃ ᐃᓄᐃᑦ ᓂᕿᖏᑦ ᐊᒻᒪ ᓂᐅᕕᕐᕕᒻᒥ ᓂᐅᕕᐊᖑᔪᓐᓇᖅᑐᑦ ᓂᖀᑦ; ᑕᒪᒃᑮᒃ ᐱᑕᖃᕆᐊᖃᖅᑐᑎᑦ ᓂᕿᖃᑦᑎᐊᕆᐊᖃᕐᓂᑎᓐᓄᑦ.
- ᓂᕿᑦ ᐱᔭᐅᔪᓐᓇᕆᐊᖃᖅᑐᑦ ᐊᒻᒪ ᐊᑭᑐᓗᐊᓐᖏᓪᓗᑎᒃ ᑭᒃᑯᑐᐃᓐᓇᕐᓄᑦ.
- ᓂᕿᒃᓴᖃᑦᑎᐊᖃᑦᑕᕈᒪᓂᖅ ᑲᒪᒋᔭᐅᔭᕆᐊᖃᖅᐳᖅ ᒪᓕᓪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐱᐅᖅᓱᐊᓂᕐᒧᑦ ᐊᒻᒪ ᒪᑭᒪᔪᓐᓇᕐᓂᕐᒧᑦ, ᐊᒻᒪ ᐱᔪᓐᓇᐅᑎᖏᑦ ᐃᓄᐃᑦ ᓇᓗᓇᐃᖅᑕᐅᓯᒪᔪᑦ ᓄᓇᕗᒻᒥ ᓄᓇᑖᓂᕐᒧᑦ ᐊᖏᖃᑎᒌᒍᑕᐅᔪᒧᑦ.
- ᓂᕿᒃᓴᖃᑦᑎᐊᖃᑦᑕᖏᓐᓂᐅᔪᖅ ᓄᓇᕗᒻᒥ ᐱᑐᐃᓐᓇᖏᑦᑐᐊᓘᒻᒪᑦ ᑲᑐᔾᔨᓗᑕ ᑭᓯᐊᓂ ᐋᖅᑭᒃᑕᐅᔪᓐᓇᖅᑐᓂ ᐊᑐᖅᑎᑦᑎᓗᑕ ᐱᓕᕆᖃᑎᒌᓐᓂᖅ/ᐃᑲᔪᖃᑎᒌᓐᓂ ᐊᒻᒪ ᑐᓐᖓᓇᕐᓂᖅ (ᒪᑐᐃᓐᖓᑦᑎᐊᕐᓗᑎᒃ, ᑐᓐᖓᓇᕐᓗᑎᒃ ᐊᒻᒪ ᑭᒃᑯᓕᒫᓂ ᐱᖃᓯᐅᔾᔨᓗᑎᒃ)
- ᐊᑲᐅᓂᖅᐸᐅᔪᖅ ᑲᒪᓇᓱᐊᕈᑕᐅᔪᓐᓇᖅᑐᖅ ᓂᕿᒃᓴᖃᑦᑎᐊᕈᓐᓇᕐᓂᕐᒧᑦ ᖃᓄᖅᑑᕐᓗᑕ ᐱᖃᓯᐅᑎᓗᒋᑦ ᐸᕐᓇᓯᒪᑦᑎᐊᕋᓱᐊᓂᕐᒧᑦ ᐊᑐᕐᓗᒋᑦ ᑕᒪᒃᑯᐊ ᐊᑐᐃᓐᓇᐅᕙᒌᖅᑐᑦ.
- ᓂᕿ ᐱᒻᒪᕆᒋᔭᐅᒻᒪᑦ ᐃᓄᐃᑦ ᐃᓕᖅᑯᓯᖓᓄᑦ, ᑐᕚᖃᖅᑐᖅ ᐃᓄᐃᑦ ᐅᖃᐅᓯᖏᓐᓄᑦ ᖃᐅᔨᔭᐅᑎᑦᑎᓂᕐᒧᑦ ᐃᓕᖅᑯᓯᑐᖃᐅᔪᓂᒃ ᐱᔾᔪᑎᖃᖅᑐᓂᒃ ᐊᖑᓇᓱᓐᓂᕐᒧᑦ, ᑲᑐᔾᔨᓂᕐᒧᑦ, ᐅᐸᓗᖓᐃᔭᐃᓂᕐᒧᑦ, ᐊᒻᒪ ᓂᕿᕆᓂᕐᒧᑦ ᓂᕿᓂᒃ.
- ᓂᕿᓃᑦ ᓴᖅᑮᔪᓐᓇᕐᓂᖅ ᐱᒻᒪᕆᐅᒻᒪᑦ ᓄᓇᕗᒻᒥ ᑮᓇᐅᔭᓕᐅᕋᑕᐅᔪᓄᑦ, ᑕᐃᒃᑯᐊ ᓴᖅᑮᕙᑦᑐᑦ, ᐱᖃᓯᐅᑎᓪᓗᒋᑦ ᐊᖑᓇᓱᑦᑎᐅᔪᑦ, ᒪᑭᒪᔾᔪᑎᒋᔪᓐᓇᖅᑕᒥᓂᒃ ᐊᖑᓇᓱᐊᖃᑦᑕᕐᓗᑎᒃ.
|
| |
